الحق نفسك قبل ماتكون واحد منهم.........

[من اجل صحه افضل]

طبعا أكيد بتسأل مين دول اللى ممكن تكون منهم ... صح ؟

- صح

- اقول لك ..... دول بقى يا سيدي 10 مليون مصاب بالالتهاب الكبدى الوبائى تسمع عنه ؟

-آه أسمع بس بصراحة معرفش عنه كتير ايه هو بقى ؟

- بص يا سيدي

-بصيت

- التهاب الكبد ده مرض بيصيب كبد الإنسان نتيجة الإصابة بالفيروس وانت عارف الكبد ده مهم بالنسبة لنا قد ايه

- آه طيب أنا سمعت انهم كذا فيروس

- فعلا هم 7 فيروسات A,b,c,d,e,f,g

- بس أن مسمعتش غير عن A,b,c

- ما هى الانواع دى هى اللى منتشرة

- طيب وده خطر يعنى ؟

- طبعا ده ممكن يأدى لتليف الكبد وبالتالى الكبد مش هيقوم بوظايفه ربنا يعافيك ويعافينا

- طيب وهى وظايف الكبد دى مهمة ؟

- طبعا مهمة جدا الكبد ده أكبر مصنع فى جسم الإنسان له حوالى 300 وظيفة ومن غير الكبد حياة الإنسان بتنتهى
شوف انت بقى لما جسمك يفقد 300 وظيفة كان عضو واحد بيأديهم

-طيب انا فى ايدي ايه يعنى ؟

- يا عم سهلة كل الموضوع انك تعمل احتياطك وتتوكل على الله

- طيب اعمل ايه يعنى؟

- جينا للمهم
بكل بساطة تغسل ايدك كويس قبل الاكل وتشرب مية نقية وطبعا بلاش الاكل من بره وكدة وخليك انت فى المضمون وفيروس A(الصفراااا) عمره ما هيجي لك

- طيب وباقى الفيروسات ؟

- بص B و C بيتنقلوا عن طريق الدم لكن برده سهلة

فيروس B تاخد التطعيم بتاعه وتتجنب تلامس اى دم وكمان طبعا مينفعش تستخدم الأدوات الشخصية لغيرك وأى حاجة ممكن توصل لدمك لازم تتأكد من سلامتها

- زي ايه يعنى ؟

-زي امواس الحلاقة وفرش الاسنان والحقن والدبابيس



طب الواحد ممكن يعمل ايه عشان يتاكد ان المرض مش عنده؟



سهله تعمل تحليل بسيط زى

PCR

او

وظاثف كبـــد زى

SGPT

SGOT

-طيب هو مفيش تطعيم لفيروس C ؟

- للأسف مفيش فلازم تاخد بالك وتحافظ على نفسك
ومفيش قدامك اختيار لان دى سلامة جسمك
وجسمك أمانه هتتحاسب عليها



طيب هو فيه اعراض مميزه للمرض ده؟



هو اعراض الفيروسات التلاته تقريبا واحده زى

-اعراض تشبه الانفلونزا

-اصفرار الجلد والعينين

-غمقان فى البول يشبه الشاى الداكن

-فتحان فى لون البراز

والتفرقه بينهم بتم عن طريق التحاليل الى قلتلك عليها فى الاول



يااااااه

طب هو فيه علاااااااج؟



والله هو بالنسبه لفيرس A علاجه بيبقى بالراحه التامه واخد ادويه مضاده للالتهاب ومضادات حيويه مع اكل انواع معينه من الاكل عشان منرهقش الكبد

اما بالنسبه لـــ B و C ده بيتعالج بحاجه اسمها الانترفيرون بس ده علاج مكلف جداااا

بيوصل تقريبا العلاج لحوالى 25 الف جنيه فى السنه او اكتر ومش كل الناس حتستجيب كمان للعلاج ده عشان كده لازم تاخد بالك كويس جدااااااااااا

[ظافر]

اهلا بك اخي الكريم في رنيم
وحياك الله علي مشاركتك

[رحمة]

مشاركة قيمة وبها معلومات مفيدة جدا
بأسلوب مبسط

شرفت المنتدى أخى الفاضل
وأهلا بمشاركاتك دائما فى منتدى الصحة
جزاك الله كل خير

[المعتز بذلته لله]

جـــــــــــــــــــــــــــــــــــزاك الله خــــــــــــــــــــــــــــــير

المشاركه فعــــــــــــــــــــــــــــــــــــــــــــــــ لا

لكن لدي ملاحظه على اللغه فارجوا المحافظه على العربيه في مجـــــــــــــــــــــــــــــــال الكتابه على الاقل

[العيون الحائرة]

السلام عليكم ورحمة الله وبركاته
بارك الله فيك وجزاك كل خير ع هده المعلومات القيمه وكلهوا فى ميزان حسناتك ان شاء الله